عمان جو.

#ايمان_عكور

الله يسامحك يا صبحي..!
ترا كله منك..!
والناس قاعدة ببيوتها.. أكل ومرعى وقلة صنعة
وكل واحد منا ماسك تلفونه بنط من جروب واتساب للثاني
بسرق كلمة من هون.. وبلزقها على كلمة من هناك..
وبالطريق بعض الكلمات بتتغير.. وبنضاف عليها شوية بهارات علشان الاثارة والتشويق.. لوازم الشغل..
والأهم علشان البعض يخدعونا
ويسرقونا عيني عينك..!
طبعا.. راس مالها.. تسجيل صوت
او فيديو حزين مع بعض المؤثرات الكورونية..!

وانت يا صبحي.. داير ولا على بالك..!
مش عارف شو الطبخة..
بتبوس.. وبتعبط.. وبتعمل زيارات
معقولة يا زلمة.. انت شكلك مش سامع بكورونا..!

ما عرفت انه بعض الاردنية بهالحبسة صاروا اشطر من جوجل.. خسى جوجل
ما عرفت يا صبحي
انه تصرفك وعفويتك وطيبتك ، الي هي طيبة كل اردني وصلت لمحكمة مجرمي
الحرب وعلقولك المشنقة بانتظار تفتح المطارات علشان يستضيفوك.!
يا زلمة معقول.. انت الوحيد اللي الحس البوليسي تاع الشعب الأردني ما عندك إياه..!

الله يسامحك يا صبحي..
شكلك ما بتعرف انه إنت صرت كبش فدا علشان البعض يتهرب من وعوده اللي اتفشخر فيها للوطن..
شكلك ما بتعرف انه في مافيات عليها ديون وشيكات وانت اجيتلهم من السما علشان يتهربوا من ديونهم.. وازيدك من الشعر بيت.. يطلعوا قدام العالم ابطال ماشاءالله همهم الوطن وصحته..!

ولك يا صبحي.. كيف هيك بتسوي
وبتحط الحق كله على كورونا المسكين

هيك بتعمل هيك مع كورونا
حتى يكون العلاّقة اللي بحطوا عليها
بعض هالجماعات اللي بتدعي الوطنية تعثراتها المالية..
لا وكمان وبطلعوا فيها ابطال قوميين
وبالناقص عن الوطن واللي فيه..!

روح عقم حالك من جوا يا صبحي..
بدل ما تعقم ادوية الناس
ترا بزمن كورونا.. الكل انكشف
وما عاد استهبال البعض على الوطن حدا يصدقه..
يا صبحي..
قلهم انه كورونا للأسف زارتك وقعدت ببيتك
بس معها جابت هدية ولا بالأحلام
لناس صدقها الوطن..
واكلت من وراهم مليون كورونا..!

وكل كورونا.. وحيتان البلد مش بخير
وأنت يا صبحي.. كون بخير
مسكين ما الك بالطابق كله
ورحم الله والدك..
ترا صبحي.. انت مظلوم
وقلوبنا معك
مصاب او غير مصاب
واذا كنت بتعرف.. بتكون ضريت وطنك
واذا فعلا ما بتعرف.. صرت بتعرف
وخليك قد المسؤولية. ما بدها بطولات

مسكين يا صبحي..!
خليني اروح ارش الادوية اللي بصيدليتي اللي معلقة ورا الباب
بلكي في كورونا ملعون تسلل وانا قاعدة بدردش معكم..
وببعثلكم الفيديو بس ازبطه
وانا بعقم صيدليتي..!
وللفيلم بقية..!

آخ منك يا كورونا
شو اللي عملته فينا..!