عمان جو - غيداء قطيشات- في بعض الأحيان هناك أشخاص لو حكت معنا أو ابتسمت النا بتغير من أفكارنا و بتنسينا همومنا يمكن هاد الشعور يأتينا من أقرب الأشخاص ، بنفرح بكلامهم و باهتمامهم في أدق التفاصيل اللي بحياتنا و بأبسط المواقف .
كل شخص منا بحب يسمع الكلمة الحلوة هي اللي بتعطينا تفاؤل في حياتنا الحالية و المستقبليه ، هي اللي بتطلعه من مرحلة الاكتئاب و قبل ما تكون تحسين نفسية شخص هو أجر من ربنا عزوجل ، الحياة رغم معاناتها إلا انها فيها أمور بتسعدنا بس احنا اللي بنغير فيها إما للأفضل أو للاسوء بدون ما نعتمد على وجود الاشخاص حوالينا ؛ لانه ممكن وجودهم بدل ما يسعدنا يتعسنا بطريقة تدخلّهم الزائد في حياتنا .
وجود الأشخاص حواليك هي اضافة حلوة بس أنت اللي بتحكّم عقلك كيف يكونو فيها و بأي وقت ..
أولاً ، ليش ما نكون ايد وحدة والاختلاف اللي بينا هو بس اختلاف بالرأي لحتى كل واحد فينا يعطي رأيه و بالآخر ناخد الحل الأنسب اللي رح نعيش عليه ونكون راضيين فيه ، ليش الأعداء بفرحوا باختلافنا ؛ لانه شايفين الاختلاف بفككنا و طبعاً انتو شايفين كل حرب بتصير هي هم في حياة كل شخص فينا ، بس الحرب ما بتيجي الا من شعبها يعني الخطأ بتفكيركم ببعدنا عن بعض وبعدنا عن دِينّا و حتى عاداتنا وتقاليدنا صرنا نتمسك بكلمة عيب اكثر من حرام ، مش غلط ابداً انه نسمع لبعض ما عجبتك هاي الفكرة اسمع رأي تاني ؛ لانه ممكن يكون عند غيرك طريقة أفضل نوصل فيها للقرار الأنسب ، أكيد الحل مش رح يرضي الناس كلها بس عادي تنازل و شوف و اسمع و فكر ، هل القرار هاد استفاد منه الكل والا لأ ؟
و إذا لأ اعترض اقترح رأي جديد يعني بالآخر الأمور بتنحل و عمرها ما انحلت بالمشاكل بالعكس رح تزيد ، خلينا نعلّم الأجيال اللي بعدنا عليه و كل سنة بتتغير العادات اللي بحياتنا يعني رح نضل بحاجة نسمع آراء ثانيه مناسبة النا و لغيرنا ، أكيد كلنا بنختلف عن بعض بتفكيرنا بس هاد الاختلاف نكسبه من ناحية ايجابية ونبعد عن الافكار اللي ممكن تدمرنا و نتطلع على القرار من كل النواحي و نقيسه على كل الناس يعني كل واحد كيف حياته و كيف عايش ، أما نضل هيك طول حياتنا مختلفين بندمر حالنا و بلادنا والله بطل في لا أمن و لا استقرار كلّه خوف على أولادنا و مستقبلهم بطلنا نسمع هاد فرح لهاد والا هاد وقف وساعد جاره أو قريبه ما بنسمع الا المشاكل ،، والا احنا ما بنحكي إلا الاشي السيء ؟!
ثاني وثالث شيء ، احنا حياتنا كلها أحلام ما فيها حلم بنحلم فيه و بصير واقع ، طيب لو كانت الحياة حلوة ما رح يكون في حالات انتحارية هدول الناس بكونو فقدوا الأمل من حياتهم بِحسو انه وجودهم بالحياة و عدمه واحد ما رح يتغير شيء لو تركها أو حتى ظل فيها ، بتعرفو شغلة أنا من الناس اللي بكون فاقدة الأمل من اي اشي بس بصير أفكر انه في ناس ممكن تكون شايفاني قدوة ، ممكن تكون سعيدة بحياتها مجرد ما تشوف إنك ضعفت تضعف و تقفد الأمل وقتها برجع بوقف من جديد و بحاول قد ما بقدر أغير من حياتي .. أغيرها للأحسن ، مش معنى انه حياتي صعبة أخليها صعبة على غيري بالعكس أخليها الهم حلوة و لنفسي أحلى و أحلى كمان هي حياة و مرة بنعيشها ، ما رح نتمنى نرجع أطفال و تنعاد حياتنا من أول و جديد و نكسب كل لحظة مرت علينا ، تعبنا و حملّنا حالنا فوق طاقتنا هم و حزن أشياء احنا مش قدها تعبْنا حالنا عشانها و لما نرجع نتطلع عليها نلاقي انه هي مش مستاهلة و احنا أعطيناها أكبر من حجمها ، و قبل كل شيء كون قريب من ربك ما حدا بنفعك غير إيمانك بالله سبحانه و تعالى و بعدها شوف كيف رح تصير تبدأ يومك و مشوارك بالحياة ، كيف رح تحس براحة داخلية بقلبك انه الجاي أفضل بإذن الله ، لا تضعف و لا تخلي الحياة هم كبير عليك اتعب عشان تعيش صح ،، تعيش وتعيّش أولادك و تعلّم الجيل اللي بعدك و تعلّم المقتدين فيك .
قد ما تكون الحياة صعبة نواجهها و ما نضعف نوقف من أول و جديد و نوصل لهدفنا للأحلام اللي بنحلم فيها ،، أنت قدها .. " وركزوا بآخر كلمة " .
#ومع_لش