عمان جو - يتقدم السيد مراد ابو جاموس وعائلته الكريمة بأسمى آيات التهنئة والتبريكات من ابنتهم جوليا بمناسبة عيد ميلادها الثالث .. وبهذه المناسبة كتب السيد مراد هذه الكلمات عبر فيس بوك :-

بتاريخ 21-09-2019 يوم السبت الساعة 11:20 الصبح تقريبا اول مرة بسمع فيها صوت بكاء بنتي جوليا والي ما سمعه حدا غيري في قاعة الانتظار، فجأة وقفت وحكيت هاد صوت جوليا.

وقتها شعرت باشي غريب اول مرة بحسه، شعور اني اب وشعور انه المسؤولية تضاعفت وبنفس الوقت فرحة لا توصف لانه ربنا رزقني بقرة عيني وتذكرت دمعتي لما الدكتورة خبرتني بالاشهر الاولى للحمل انه الجنين انثى.

يوم ميلادك كنت محضر الكاميرا وطلبت من قسم الخداج يسمحولي اصورك لبست الروب ودخلت اصورك وكلي لهفة حتى اشوفك.

كتير شغلات تغيرت من لما ربنا وهبنا ياكِ شخصيتي واسلوبي وخوفي كل يوم عليكي ودعائي انه ربنا يمد بعمري حتى احميكِ واوصلك لبر الآمان واحققلك كل الي بتتمنيه في حياتي.

اليوم صار عمرك ٣ سنوات يا بابا وان شاء الله كل عام وانت بصحة وسلامة ورضى من رب العالمين ودائما بستودعك عند ربنا.

بوعدك يا بابا اني اضل الجبل الي ساندك والظل الي بحميكِ والامان بكل لحظة من حياتي وحياتك وبوعدك كمان اني اخليكي تقدري تحكمي على الناس بالطريقة الصح وما تنخدعي بالدنيا والناس الي حواليكي.

انا بستنى اللحظة الي تكبري فيها حتى احكيلك شو صار بحياتنا واشكيلك همومي واشاركك فرحي واخد رأيك بكتير شغلات.

الله يباركلنا فيكي وتضلي البسمة والضحكة وكل اشي حلو بحياتنا.